Президент Садыр Жапаров социалдык тармактагы Алексей Ширшов, Курманбек Бакиев жана "Капитал банктын" айланасында айтылып жаткан кептер боюнча "Кабар"  улуттук агенттигине маек берди.

Журналист президенттен эл арасында рубль менен операцияларды "Капитал банк" аркылуу гана жүргүзүү чечими Ширшовго байланыштырылууда деп комментарий сураган.

Президенттин жообу:

Ширшов менен Бакиевден корккондор ушундай жалган ушактарды тарата беришет;

жакында "Бакиев келет экен" деп бир дүрбөп чыгышты. Келсе эмне болуптур? Бир жагында Убактылуу өкмөттүн мүчөлөрү, экинчи жагында Бакиев олтурат да, соттук териштирүүлөр болот. 15 жыл мурда болгон жашыруун сырлардын бардыгы ачылат;

Ширшов боюнча көптөн бери эле ар кандай ушактарды таратып келе жатышат. Ширшов бир дагы мамлекеттик ишканага жакын жологон жок, жолотпойбуз дагы;

"Капитал банк" 100 пайыз мамлекеттики. Ага Каржы министрлиги 100 пайыз ээлик кылат жана аны толук көзөмөлдөп турат;

Америка тарап "силер санкцияга кирген товарлардын акчаларын которуп, Россияга жардам берип жатасыңар" деп "Керемет банкка" санкцияга киргизгенден кийин рубль менен бир эле банк иштесин деп, "Капитал банкты" аныктаганбыз;

ушундан кийин дагы Америка банктарыбызга санкция сала берсе, бул аракеттерин жөн гана Кыргызстанга бут тосуу деп билсек болот;

рубль менен иштеп, көп каражат таап жүргөн банктар рублдан пайда таппай калып кыжалат болуп, ушундай жалган ушактарды таратып жатышат.